काठमाडौँ । नवनियुक्त प्रधानमन्त्री केपी शर्मा ओलीले पद तथा गोपनीयताको शपथ लिएका छन्
सोमबार राष्ट्रपति कार्यालय शीतल निवासमा आयोजित समारोहमा राष्ट्रपति रामचन्द्र पौडेलबाट प्रधानमन्त्री ओलीले पद तथा गोपनीयताको शपथ लिएका हुन् । प्रधानमन्त्री ओलीले देशको ४५ औँ प्रधानमन्त्रीका रूपमा शपथ लिएका हुन् ।
शपथग्रहण समारोहका उपराष्ट्रपति, प्रधानन्यायाधीश, प्रतिनिधिसभाका सभामुख, राष्ट्रियसभाका अध्यक्ष, पूर्वप्रधानमन्त्रीहरु, सांसद, कूटनीतिक नियोगका प्रतिनिधिलगायतको सहभागिता रहेको थियो ।
राष्ट्रपति पौडेलले आइतबार नेपालको संविधानको धारा ७६ (२) बमोजिम नेपाली कांग्रेस र नेकपा (एमाले) को समर्थनमा एमालेका अध्यक्ष ओलीलाई आइतबार प्रधानमन्त्रीका रूपमा नियुक्त गरेका थिए ।
ओली नेतृत्वको सरकारमा कांग्रेसबाट १०, एमालेबाट ८, जनता समाजवादी पार्टीबाट २ र लोकतान्त्रिक समाजवादी पार्टीबाट १ गरी २१ मन्त्री समेटिएका छन् ।
प्रमुख सत्ता साझेदार कांग्रेस प्रकाशमान सिंहको नेतृत्वमा सरकारमा सहभागी भएको हो । साना पार्टी जसपा र लोसपाले मात्र सरकारमा स्थान पाएका छन् । नागरिक उन्मुक्ति पार्टी, जसपा र जनमतले ओली सरकारमा स्थान पाएनन् । २५ सदस्यीय मन्त्रिपरिषदमा अब ३ जना राज्यमन्त्री मात्र नियुक्त हुन बाँकी छ ।
यस्तो छ ओली मन्त्रिपरिषद्
प्रकाशमान सिंह – उपप्रधान एवम् सहरी विकास मन्त्रालय
विष्णु पौडेल –उपप्रधान एवम् अर्थ मन्त्रालय
पृथ्वीसुब्बा गुरुङ – सञ्चार तथा सूचना प्रविधि मन्त्रालय
रमेश लेखक – गृह मन्त्रालय
शरतसिंह भण्डारी – श्रम, रोजगार तथा सामाजिक सुरक्षा मन्त्रालय
आरजु राणा – परराष्ट्र मन्त्रालय
प्रदीप पौडेल – स्वास्थ्य तथा जनसङ्ख्या मन्त्रालय
बद्री पाण्डे – संस्कृति, पर्यटन तथा नागरिक उड्डयन मन्त्रालय
रामनाथ अधिकारी – कृषि तथा पशुपक्षी मन्त्रालय
प्रदीप यादव – खानेपानी मन्त्रालय
बलराम अधिकारी – भूमि व्यवस्था, सहकारी तथा गरिबी निवारण मन्त्रालय
दामोदर भण्डारी – उद्योग, वाणिज्य तथा आपूर्ति मन्त्रालय
नवलकिशोर साह सुडी – महिला, बालबालिका तथा ज्येष्ठ नागरिक मन्त्रालय
देवेन्द्र दाहाल – भौतिक पूर्वाधार तथा यातायात मन्त्रालय
तेजुलाल चौधरी – युवा तथा खेलकुद मन्त्रालय
अजय चौरसिया – कानुन, न्याय तथा संसदीय मामिला मन्त्रालय
विद्या भट्टराई – शिक्षा, विज्ञान तथा प्रविधि मन्त्रालय
मानवीर राई – रक्षा मन्त्रालय
दीपक खड्का – ऊर्जा, सिचाइँ तथा जलस्रोत मन्त्रालय
राजकुमार गुप्ता – संघीय मामिला तथा सामान्य प्रशासन मन्त्रालय
ऐनबहादुर शाही – वन तथा वातावरण मन्त्रालय